《男人的秘密聚會》
老婆有次陪我去兄弟嘅聚會，然後走個陣佢問我，乜你哋平時就係咁喇？係，當晚因為知道有太太出席，兄弟們準備好播NASA，即係乜？就係睇住個星空嘅直播，大家飲下酒，講吓時事，講吓生活。
我當然無講乜，但事實上，有女人在場，男人仲可以講乜？今次我一次過向女士們揭開男人傾計嘅真面目，希望唔會收到死亡恐嚇。
我哋成日講，男人只會煩兩件事，女人同錢，錢呢樣野我哋好少講，除非真係好大件事啦，所以基本上男人聚會都係講女人，而呢個年紀，已經唔會講暗戀苦戀等等，因為好多都已為人夫，通常都係講老婆多。
有次聚會，有朋友話十點一定要走，我哋問走得咁急做乜，佢話返去要洗底褲，我哋即時意會到，我相信呢位唔太注重衛生嘅朋友，除非佢瀨咗屎，唔係都唔會急住洗底褲嘅，而好多男人都明，咁著重底褲嘅通常都係女人。
無錯，佢要趕返去幫老婆洗底褲，唔好問點解唔用洗衣機洗，咁只係證明你未結婚，貼身內衣，有好多女性都會要求分開洗，仲要用手洗，大家都明，因為我都洗過，而有經驗嘅朋友話，你不如買個小型洗衣筒，用腳踩踩吓就可以洗到，慳水慳力嘛。
然後又有朋友講佢老婆最近因為疫情問題需要轉型，去咗學線面，所以佢依家每日就要比佢老婆做練習，咁當然皮膚好咗，但佢一邊摸自己塊面一邊帶著無奈嘅笑容。
有朋友話最近比老婆禁足，原因係佢係結婚周年紀念同朋友出去食飯，咁我哋一致認為佢係抵死嘅，佢都話自己當日唔知做乜，可能時運低所以唔小心做錯事，依家就要承受惡果。
而另一個朋友又講佢老婆話佢成日打機，想買部ps5又唔可以扮係router，因為佢老婆都唔蠢；而我就會講老婆話我洗碗洗唔乾淨要重洗之類……
一班人夫可以傾乜，咪就係係屋企有乜苦，我可以話你知，一講，大家都係會講好多，或者外人會覺得呢個係鬥慘大會，但講落大家最後，都係會有種釋懷。
男人就係咁，講完呻完發洩完，就當無事發生，帶住放鬆嘅心情返到屋企繼續做一個小男人。
成個感覺就好似創傷後遺症病患嘅聚會咁，大家將開心唔開心嘅野講出，然後其他人鼓掌，安慰一番。
所以，千祈唔好問點解唔帶埋你去聚會，因為一有女人在場，成晚就會變得好假，大家要搵野講，要扮開心，因為一個唔覺意，你會比身邊嘅伴侶覺得。
啊！係唔係我係度你特別唔開心啊！
屌，真係一諗就有聲啊！
Search